រដ្ឋបាលរាជធានីភ្នំពេញក្រឿនរំលឹកដល់អាណាព្យាបាលឱ្យនាំកុមារអាយុពី៦ ដល់ក្រោម១២ឆ្នាំទៅចាក់វ៉ាក់សាំងបង្ការជំងឺកូវីដ-១៩
ភ្នំពេញ៖ រដ្ឋបាលរាជធានីភ្នំពេញក្រឿនរំលឹកសាធារណជនទាំងអស់ឱ្យនាំកុមារអាយុពី៦ ដល់ក្រោម១២ឆ្នាំទៅចាក់វ៉ាក់សាំងការពារជំងឺកូវីដ-១៩ ឱ្យបានមុនពេលបិទបញ្ចប់យុទ្ធនាការចាក់វ៉ាក់សាំងទៅតាមទីតាំងចំនួន៨ក្នុងរាជធានីភ្នំពេញ។
ក្នុងសេចក្តីជូនដំណឹងចុះថ្ងៃទី៨ ខែតុលា ឆ្នាំ២០២១ សាលារាជធានីភ្នំពេញ បានលើកឡើងថា កុមារមួយចំនួននៅមិនទាន់អញ្ជើញមកទទួលវ៉ាក់សាំងបង្ការជំងឺកូវីដ-១៩នៅឡើយដោយសារមូលហេតុផ្សេងៗ ដូច្នេះសាលារាជធានីនឹងបន្តចាក់វ៉ាក់សាំងសម្រាប់ដូសទី១ដល់កុមារដែលមានអាយុពី៦ឆ្នាំ ដល់ក្រោម១២ឆ្នាំបន្តទៀតរហូតដល់មានការជូនដំណឹងថ្មីនៅតាមទីតាំងដែលបានកំណត់។
ទីតាំងទាំង៨ដែលរដ្ឋបាលរាជធានីភ្នំពេញបានកំណត់នោះមាន មន្ទីរពេទ្យបង្អែករាជធានីភ្នំពេញ មន្ទីរពេទ្យបង្អែកចតុមុខ មន្ទីរពេទ្យបង្អែកដង្កោ មន្ទីរពេទ្យបង្អែកមិត្តភាពកម្ពុជា-ចិនសែនសុខ មន្ទីរពេទ្យបង្អែកច្បារអំពៅ មន្ទីរពេទ្យបង្អែកពោធិ៍ចិនតុង មន្ទីរពេទ្យបង្អែកព្រែកព្នៅ និងមន្ទីរពេទ្យបង្អែកសម្ដេចឪ-សម្ដេចម៉ែ៕